सेमरा के ब्यथा

तारकेश्वर राय तारक:-

सेमरा गोहरावता आपने दुलरूवन के,
ओकर माटी में जनमल पहरुवन के।
सुन ल आज नाही त सुनब कहिया,
बड़ा आस से देखता तोहरे रहिया।

सुनला बचवा ब्यथा अपना गाँँव के,
माटी जनमल, पहचान ही तोहरा नांव के।
एकर माटी लपटाईल तोहरा देह से,
अब एकर वजूद बाँची खाली रउरे नेह से।

देखते देखत त आधा ओरा गईल,
रहिया देखत त ई पानी में बोरा गईल।
आन्हर भईल बा ई प्रशासन,
बहीर भईल, गोहार नइखे सुनत शासन।

करब इन्तजार जबले ना बुड़ जाव,
निहोरा बा सबसे अबो सब जुड़ जाव।
समवेत स्वर जब उठी समाज से,
हर तबका छोट-बड़ पूजा-नमाज से।

कड़ा बिरोध जब प्रसाशन सुनी,
होखी आदेश काम होखी दूनो जूनी।
ट्वीटर पर आज ट्वीट के आंधी बहे,
जे जहाँ बा ओहिजे से जरूर कुछ कहे।

जंगे आजादी में हमरो बा लागल खून,
माई गंगा के तांडव क देइ एके सुन।
रउवा सहयोग के बा खूबे दरकार,
शहीदी गाँव के बचा लेईं ए सरकार।

(कविता के रचनाकार एक श्रेष्ठ लेखक व कवि हैं तथा भोजपुरी भाषा को समृद्ध बनाने के लिए निरन्तर प्रयासरत हैं)